المدة التي يظل فيها فيروس كورونا حيا علي الملابس والجلد والنقود
أسئلة تكررت كثيرا منذ ظهور فيروس كورونا واختلفت فيها الاجابات.
فيروس كورونا بينتقل عن طريق الهدوم ولا لأ؟ وبيفضل صاحي على الفلوس الورق قد ايه؟ ولو نزل على جسم حيوان زي القطة او الكلب بيفضل صاحي على جلد الحيوان قد ايه ؟ طب هل بيفضل صاحي على الاسطح؟ وقد ايه؟
جزء من الاجابات كنت عارفها من دراسات قبل كده زي انه بيفضل صاحي على الاسطح الاستنلس والكرتون لكن الاجابات التفصيلية بالذات بالنسبة للهدوم وورق الفلوس وجلد الحيوانات واللحوم برا التلاجة او داخل التلاجة كانت مش معروفة لحد ما انعملت الدراسة دي تبع وزارة الدفاع الامريكية
عنوان الدراسة:
دراسة الثبات الحيوي لفيروس كورونا على الجلد والفلوس والهدوم
Modeling the Stability of Severe Acute Respiratory Syndrome Coronavirus 2 (SARS-CoV-2) on Skin, Currency, and Clothing
في الدراسة تم تعريض عينات من ورق بنكنوت جديد وقماش بوليستير وجلد حيوان (خنزير)
كنا عارفين بس مش متاكدين ان الفيروس ممكن يتنقل عن طريق الفلوس والهدوم ويفضل على الجلد لكن ما كانش معروف قد اية وفي اي درجة حرارة وهل فيه تأثير الحرارة والبرودة على حيوية الفيروس على الاسطح دي
كنا عارفين انه بيفضل صاحي على الايدين وممكن الايدين تنقله للانف ولازم نغسلها كل شوية لكن برضه ما كانش معروف بيفضل صاحي قد ايه على الايدين ومش معروف درجة الانتقال عن طريق الهدوم قد ايه ولا سرعته
الدراسة استخدمت فيروس كورونا حي وحطته على ٤ اسطح:
١- جلد حيوان (خنزير) بعد ازالة الشعر
٢- ورقة بنكنوت جديدك خارجة من مصلحة صك العملة لم تتداول من فئة الدولار
تركيبها ٢٥٪ كنان و ٧٥٪ قطن وعليها حبر سري ازرق واحمر
٣- ورقة بنكنوت جديدك خارجة من مصلحة صك العملة لم تتداول من فئة ٢٠ دولار
تركيبها ٢٥٪ كنان و ٧٥٪ قطن وعليها حبر سري ازرق واحمر
٤- قطعة قماش جديدة غير مستخدمة تركيبها ٣٥٪ قطن و ٦٥٪ بوليستر
تم عمل ٣ نسخ من الاسطح الاربعة وتم وضع الفيروس عليهم واتحطت كل نسخة في الحضانة في ٣ درجات حرارة مختلفة
النسخة الاولى درجة حرارة ٤ م
النسخة التانية درجة حرارة ٢٢ م
النسخة الثالثة درجة حرارة ٣٧ م
وتم فحص حيوية الفيروس بعد:
٠ساعة، ٤ ساعات، ٨ ساعات، ٢٤ ساعة، ٧٢ساعة، ٩٦ساعة، ٧ ايام، ١٤ يوم
النتائج:
درجة ٤ م:
فيروس كورونا فضل صاحي على الجلد عند درجة حرارة ٤ م لمدة اسبوعين (لاخر التجربة)
وفضل صاحي على ورق البنكنوت من فئة دولار و٢٠ دولار لمدة اسبوع عند درجة ٤ م لكن مات عند اسبوعين
درجة ٢٢ م:
فضل الفيروس صاحي على الجلد في درجة ٢٢ م ٩٦ ساعة وبعد كده مات
في درجة ٢٢ فضل صاحي على ورقة البنكنوت فئة ا دولار ٨ ساعات بس ومات
في درجة ٢٢ م فضل صاحي على ورقة البنكنوت فئة ٢٠ دولار ٢٤ ساعة
في درجة ٢٢ م فضل الفيروس صاحي على الهدوم ٤ ساعات فقط ومات بعدها
درجة ٣٧ م (درجة حرارة الجسم):
فضل الفيروس صاحي على الجلد ٨ ساعات فقط ومات في درجة حرارة الجسم العادية
فضل صاحي على الهدوم ٤ ساعات فقط في درجة ٣٧ م
وفضل صاحي على ورقة الدولار ٤ ساعات فقط في درجة حرارة ٣٧ م لكن استمر ٨ ساعات في نفس درجة الحرارة على ورقة ال ٢٠ دولار
الاستنتاجات:
الفيروس بيفضل صاحي على الجلد اطول من اي من الاسطح الثلاثة الاخرى في كل درجات الحرارة
الاختلافات بين الاسطح الاخرى ماعدا الجلد كانت مش كبيرة اوي
الدراسة اثبتت ان التبريد بيساعد الفيروس يفضل صاحي على الجلد لمدة اسبوعين لكن زيادة درجة الحرارة بيؤدي الى تسارع موت الفيروس على الاسطح
الدراسة اثبتت ان الفيروس بيفضل حي على الجلد والهدوم وورق البنكنوت وبالتالي ممكن يسبب عدوى وان حيويته تتناسب عكسيا مع درجة الحرارة
ده بيبين اهمية غسيل الايدي لمنع نقل الفيروس من جلد الايدين للوجه بالذات ان فيه دراسة على طلبة الطب لاحظت ان الطالب بيلمس وشه ٢٣ مرة في الساعة
الدراسة استخدمت جلد الخنزير لانه قريب في تركيبه من جلد الانسان
كمان الدراسة بينت ان لو الفيروس لوث لحمة او فراخ وبعدين دخلت الفريزر فممكن يفضل صاحي اسبوعين ويمكن اكتر (مدة الدراسة كانت اسبوعين بس)
علشان كده المجازر الالية واماكن ذبح الحيوانات والفراخ لازم تراعى فيها اقصى درجات الدقة والرقابة لمنع انتقال العدوى من الجزار سواء عنده اعراض او لا الى اللحم
وحصل فعلا ان مذبح كبير في المانيا اتلوث بالكامل وقفلوه
الدراسات السابقة اثبتت ان الفيروس يظل حي على البلاستك والكرتون والاستنلس ستيل ساعات لايام
https://www.medrxiv.org/content/10.1101/2020.07.01.20144253v1.
منقول من صفحة د أحمد سامح
شكرا على المقال
ردحذف